Komin í hús........

Já nýja vélin kom í hús í gær, fór og keypti eitt stk Gorenja uppþvottavél eftir mikla leit okkar hjóna, held bara að við höfum farið á alla staði um helgina til að skoða úrvalið, sem er gífurlega mikið. Verðið er á bilinu 35.000 til 200.000 (ekki samt gullslegin)ef ég ætti skítnóg af peningum þá mundi ég kannski kaupa svo dýra vél. Nú er gripurinn kominn á sinn stað en það á eftir að kaupa hurð og setja sökkulinn undir, þetta verður allt orðið klárt um páskana, vonandi.

Hvað er með þetta veður?? Ég veit að við búum á hjara veraldar en kom on - brjáluð hálka í morgun og snjókoma svona eins og maður vill fá á jólunum ekki í mars. Bíð með óþreyju eftir sumrinu!

Er á kafi að skrifa ritgerð um Röddina eftir Arnald Indriðason, hrikalega spennandi bók, þið verðið að lesa hana.
Skyldan kallar-(ritgerðin)
Þangað til næst....amma kveðjur.

Hvað er mikilvægara en uppþvottavél?

Mikilvægasta heimilistækið á heimilinu að mínu mati er uppþvottavél.

Okkar bilaði fyrir nokkru síðan, og hefur líf mitt verið frekar niður á við eftir það. Nei kannski ekki alveg en mikið hrikalega er þetta lífsnauðsynlegt tæki, uppvask er mitt leiðinlegasta heimilisverk fyrir utan klósett þrif! Eg hef verið extra dugleg að elda því þá þarf ég ekki að vaska upp, hinir heimilismeðlimir sjá um það. Fyrst var reynt að gera við hana en það var alveg sama hvaða varahlutur var keyptur hún bara vildi ekki í gang. Þannig að nú er staðan sú að við ætlum að kaupa okkur nýja vél, og þá hófst leitin mikla!!! Hvernig vél viljum við?? Eigum við að hafa hana stál eða hvíta? Á hún að vera á sökkli eða frístandandi eins og gamla vélin? Eða á hún jafnvel að vera innbyggð og reyna að fá hurð framan á hana eins og er í innréttingunni? Í dag fór ég að skoða vélar og komst að þeirri niðurstöðu að fallegast væri að vera með innbyggða, svo nú þarf ég að fara á stúfana á morgun og ath. hvort það sé hægt að fá hurð í sama viðnum og er hjá okkur og hvað það mun kosta. Svo verður bara tengdasonurinn píndur í að setja upp sökkul og setja hurðina á ef við komum til með að kaupa þannig vél. Alltaf þegar maður fer í svona hugleiðingar langar manni að gera ennþá meira, t.d. fá sér ný eldunartæki, draumur að vera með gas, setja nýjar borðplötur (granít) og jafnvel nýjar flísar á milli skápa, pínulítið dýr smekkur!!! En vélin verður að duga í bili, ekki hægt að fara til útlanda og fríska upp á eldhúsið á sama árinu.

Endilega kvittið þegar þið kíkið í heimsókn, það eru allt of margir sem kvitta ekki!!!

Þangað til næst............amma kveður.

Árshátíð - Afmæli

Gamla settið fór á árshátíð sl. laugardag hjá starfsmannafélagi Kópavogsbæjar og var hún haldin í Fífunni, veitti ekki af stóru húsi því 1560 manns voru þar saman komnir. Ég var nú smá efins um að hægt væri að gera þennan risa íþróttasal vinalegan, en viti menn þegar inn var komið var búið að skreyta salinn og var grænt þema. Fordrykkurinn var grænn, á skjánum sem voru risastórir voru græn norðurljós, meira að segja við innganginn voru fagurgræn tré í kerjum, spurning hvort þar væru komin tré úr Heiðmörk!
Eða var verið að segja okkur hvað við ættum að kjósa í vor??

Veislustjóri var Örn Árnason og fór hann með vel með það hlutverk, skemmtiatriðin voru allt í lagi, Lay Low stóð fyrir sínu, Vallagerðisbræður komu og sungu nokkur lög, mér fannst þeir hundleiðinlegir! Æi þarna er ég kannski full dómhörð, en eflaust eiga þeir framtíðina fyrir sér, þetta eru svo ungir drengir. Hundur í óskilum voru bestir að mínu mati, ótrúlega frjóir og skemmtilegir menn þar á ferð. Barritonsöngvari sem ég man ekki hvað heitir kom og söng, allt í lagi, er meira hrifin af tenórum :-) Sb. afi gamli!

Maturinn var MJÖG góður, humarsúpa, nautafile og súkkulaðistöff í eftirrétt.

Síðan var bara tjúttað fram á nótt og sáu Papar um að halda fólkinu í stuði.

Á sunnudeginum var svo afmæli hjá "litla bró" og að venju voru kræsingarnar svo girnilegar og miklar að veisluborðið svignaði næstum því, en með því að vera ótrúlega dugleg við að smakka á öllu þá slapp þetta nú fyrir horn! Nú þarf ég bara að eiga við samviskuna, því auðvitað sest þetta allt á maga, rass og læri!
Saknaði frænku sem er ENNÞÁ í Ammerrríku, hún fer nú sem betur fer að koma heim......... kemur um leið og farfuglarnir í apríl.

Þangað til næst.....amma kveðjur.

Myndir

Þetta eru aðaldúllurnar mínar, ég get endalaust tekið myndir af þeim. Núna þessa dagana og vikurnar verð ég að passa Vilhelm eftir vinnu hjá mér, ég næ í hann til dagmömmunnar og hann er hjá mér þangað til pabbi hans kemur að ná í hann eða ég fer með hann heim. Hann er afskaplega góður strákur og þarf ég lítið að hafa fyrir honum. Bara að passa upp á að hann fái að borða reglulega!

Núna er hann vaknaður, fékk sér bjútíblund út í vagni, og pabbi hans alveg að koma og ná í hann og ég þarf að skreppa í hesthúsið þegar hann er farinn, svo þetta verður ekki lengra í dag.

Þangað til næst............amma kveðjur.

Flensa.......

Ekki þó fuglaflensa sem betur fer.

Húsbóndinn lá í inflúensu í 12 daga, hann fékk bakteríusýkingu upp úr flensunni sem lýsti sér sem stífluðum kinn- og ennisholum og svo voru báðar hljóðhimnurnar sprungnar hjá honum. Hann fékk dúndur penselínskammt sem hann á að taka í 7 daga. Ég hef bara aldrei séð karlinn minn svona veikann í öll þessi ár sem ég er búin að þekkja hann, sem eru nú orðin ansi mörg (24 ár). Aðrið heimilismeðlimir hafa fengið kvefpest sem er líka að ganga, kvef - hausverk - hálsbógu og almenn vanlíðan og flokkast það ekki undir inflúensu. Held að kötturinn hafi líka fengið einhverja pest því hann er búin að vera stórskrítin uppá síðkastið, meira en venjulega!

Set inn eina mynd af afa gamla í tilefni þess að hann á afmæli á morgun og vonum að allar kvefpestir sem og aðrar pestir fari nú á eitthvað annað heimili en okkar!!!

Hestar og hestaferðir

Ég var svo ljónheppin um daginn að það hringdi í mig góð kona og spurði hvort ég vildi aðstoða hana í hesthúsinu og fara með henni á hestbak þegar veður er gott. Ég hélt það nú, enda eru hestar eitt af mínum uppáhaldsdýrum, sitja í efsta sæti ásamt hundum. Verst að eiginmaðurinn er ekkert gefinn fyrir hesta, vill bara fá sín hestöfl úr mótorhjólinu, og ekki vil ég þeysast um landið á vélfáki. Ég er ekki ennþá búin að fara í útreiðatúr en það gerist vonandi í þessari viku. Ég hef aldrei umgengist hesta í hesthúsi svo ég þarf aðeins að venjast þeim þar og þeir að venjast mér. Svo er ég nú ekki komin svo langt að geta kembt þeim, en ég moka, gef og næ í þá út í gerði.
Svo vorum við vinkonurnar að ákveða að fara í Valkyrjuferð í sumar, íííííííhhhhhhhhaaaaaaaaa.
Það verður bara gaman!!!

Get eiginlega ekki beðið eftir sumrinu, ég ætla að gera svo margt. Fara í frí til Lindu frænku sem býr í Ameríku, passa Vilhelm, fara í hestaferð/ir og svo vona ég að við förum í útilegur og veiðiferðir eins og öll önnur sumur.

Flensan hefur sem betur fer ekki ennþá stungið sér niður á heimilið 7-9-13. En litla prinsessan mín er komin með hálsbólgu og kvef en samt ekki með hita. Hún svaf voða lítið í nótt var alltaf að fara á klósettið því henni var svo flökurt.
Við vorum því bara heima i dag, en mætum vonandi galvaskar út í lífið á morgun.

Þangað til næst...............amma kveður.

Fluttningar

Þá er litla fjölskyldan flutt og er alveg hrikalega tómlegt hérna hjá okkur. Það er nú ekki eins og við séum bara 2 eftir, nei því er nú öðru nær, við erum 6 eftir á heimilinu og er Gríma the cat þá talin með! Ég er alveg viss um að kötturinn saknar þeirra líka, hún ráfar hérna um og er eflaust að leita að bælinu sínu sem hún hélt að hún ætti í dótinu hans Vilhelms.

Svo eru nokkrir dagar í að Matti tali bani komi heim frá Afganistan, og er hans dvöl þar þá lokið. Mikið held ég að Þórunn verði glöð að fá hann heim, og ég gæti sko trúað að mamma taki villtan stríðsdans að hætti Indjána! Sjái þið hana ekki í anda taka sporinn á stofugólfinu :-) Látið mig vita ef það verður rigning í svíaríki um næstu helgi!

Er byrjuð í fjarnámi aftur eftir jólafrí, núna ætla ég að glíma við ísl. 202, hlakka til að takast á við verkefnin sem bíða mín þar. Tók Siðfræði 102 fyrir áramót, og náði áfanganum með sóma, sem betur fer, því þetta var drepleiðinlegur áfangi og hefði sko ekki nennt að taka hann aftur! Stefni á að fara í nuddnám og þarf ég að taka slatta af einingum til að eiga möguleika á að komast þar inn. En ég stefni nú ekki á þetta með hraði, heldur verð ég mjög ánægð ef ég gæti verið orðin nuddari um árið 2012.
Og þessi skrif mín núna minna mig á það að ég á eftir að ljúka við að lesa smásöguna um son snillingsins, og því ætla ég að hætta þessu bulli núna og snúa mér að lestri hennar.

Þangað til næst..........amma kveður.